TODAS ang isang 39-anyos na lalaki nang barilin ng isang pulis-Bicutan sa Tondo, Maynila kaninang umaga.
Binawian ng buhay habang ginagamot sa Gat Andres Bonifacio Hospital ang biktimang si Augusto Bulan, ng Pier 18 Vitas St., Balut, Tondo, Maynila sanhi ng tama ng bala sa katawan.
Pinaghahanap naman ng pulisya ang suspek na si PO2 Roderick Maniti, nakatalaga sa National Capital Regional Police Office (NCRPO) at taga-Malabon City.
Sa ulat ni SPO2 Milbert Balingan ng Manila Police District (MPD)-Homicide Section, dakong 5:20 ng umaga nang naganap ang insidente sa C. M. Recto malapit sa panulukan ng Sto. Cristo St., Tondo.
Sa imbestigasyon, katatapos lamang rolyohin at ayusin ng biktima at ni Rodolfo Rivera, 16, ang isang electrical wire at habang naglalakad upang ihatid sa isang warehouse ang narolyong wire ay nakasalubong nila ang suspek at binati ang biktima at sinabing “Ok ka lang Pare”.
Gayunman, hindi pinansin ng dalawa ang suspek na ikinagalit naman ng huli dahilan para bumunot ng baril at walang sabi-sabing pinaputukan ang biktima.
Hindi pa nakuntento ang suspek, muli pa nitong nilapitan ang biktima at muling binaril saka kaswal na naglakad papalayo sa lugar.
Ang bangkay ng biktima ay kasalukuyang nakalagak sa Sol Funeral para sa safekeeping at awtopsiya. JOCELYN TABANGCURA-DOMENDEN