TUMAGAL nang 10 oras ang sunog sa residential Area B, Gate 10, Parola Cmpd., Tondo, Maynila.

Alas-9:41 kagabi nang magsimula ang sunog sa bahay ng isang Lola Adan at idineklarang fireout kanina lamang alas-7:25 ng umaga.

Ayon kay Fire C/Insp. Marvin Carbonel, fire marshal ng BFP-Manila, nasa 3,000 pamilya ang nawalan ng bahay.

Tinatayang aabot naman sa P6-milyong halaga ng ari-arian ang natupok ng apoy.

Limang sibilyan at 16 bumbero naman ang nagtamo ng minor injuries.

Inaalam pa ng awtoridad ang sanhi ng sunog na umabot sa Task force Delta. JOCELYN TABANGCURA-DOMENDEN

NATAGPUANG palutang-lutang sa Ilog Pasig ang bangkay ng isang lalaki sa Port Area, Maynila.

Sa ulat ni SPO2 Jonathan Bautista, ng Manila Police District (MPD)-homicide section, nabatid na dakong 10:10 ng umaga nang madiskubre ang bangkay ni Belardo Francisco, 48, walang hanapbuhay, ng 854 P Sta. Rita St., Tondo, na palutang-lutang sa ilog Pasig, sa tabi ng International Container Terminal Services Inc. (ICTSI) sa Port Area.

Mismong ang mga empleyado umano ng ICTSI ang nakadiskubre sa bangkay, na kaagad namang iniahon ng mga mangingisda sa lugar.

Kaagad namang ipinabatid ng mga empleyado ang insidente sa mga awtoridad upang maimbestigahan ang dahilan ng kamatayan nito.

Narekober ng mga pulis mula sa bangkay ang isang barangay ID na inisyu ng Brgy. 11, Zone 2, District 1, na nagresulta para matukoy ang pagkakakilanlan ng biktima.

Wala namang nakita ang mga pulis na sugat o anumang palatandaan na sinadya ang pakamatay ng biktima ngunit patuloy pa rin nilang iniimbestigahan ang kaso. JOCELYN TABANGCURA-DOMENDEN

INIIMBESTIGAHAN ngayon ng Manila Police District (MPD) ang pagkamatay ng isang babaeng binaril sa riles ng tren sa Tondo, Maynila kaninang madaling-araw (Lunes).

Inilarawan ang biktimang may edad 20-25, May taas na 5″1, katamtaman ang pangangatawan, naka-blue jacket, pink T-shirt, at tsinelas.

Sa report ni Supt. Alex Daniel, hepe ng MPD-Station 7, nanonood ang isang Mark Torregoza, 27, dakong 1:30 ng madaling-araw, ng 980 Hermosa St., Tondo, nang nakarinig siya ng sunod-sunod na putok.

Pinuntahan niya ang pinanggalingan ng putok kung saan nakita niya ang babaeng nakadapa at duguan sa may riles ng tren.

Dahil dito, agad niyang ini-report sa tanod ng Barangay 200 na siyang nag-report sa pulis.

Limang basyo ng kalibre .45 at cellphone ang narekober sa crime scene.

Inaalam pa kung ano ang motibo sa pagpatay. JOCELYN TABANGCURA-DOMENDEN

IPINAG-UTOS ni Manila Mayor Joseph Estrada na mas bigatan pa ang parusa sa mga “smoking ban violators” sa lungsod.

Ayon kay Estrada, mukhang hindi na sapat ang P500 multa at dalawang araw na kulong upang pigilang manigarilyo ang mga tao sa mga pinagbabawal na lugar.

“We will increase the fine up to P1, 000, or P2, 000 up to P3, 000 with imprisonment. May kasamang imprisonment from one day up to 10 days. Light up or you’ll get lit up,” babala ni Estrada.

Pinadadali na ni Estrada sa Sangguniang Panglungsod ang pagpasa ng Draft Ordinance No. 7812 na magtatakda ng mas mataas na multa sa mga smoking ban violators.

Isang araw bago ang Valentine’s Day, iniutos ni Estrada ang mahigpit na pagpapatupad ng smoking ban sa lungsod ayon sa City Ordinance 7748 na ipinasa noon pang 2011.

Pinagbabawal ng nasabing ordinansa ang paninigarilyo sa mga ospital, paaralan, public buildings, shopping malls, at iba pa, maging sa mga pampublikong sasakyan, sa lungsod.

Magmumulta ng P500 o dalawang araw na kulong ang mga mahuhuling violators.

Sa city hall, sa mga gates na lang ng Arroceros, Taft Avenue at Freedom Triangle maaaring manigarilyo.

Ayon kay District 6 Councilor Casimiro Sison, ang may-akda ng draft Ordinance No. 7812, panahon na upang lalo pang higpitan ang pagpaparusa sa mga smoking ban violators.

“It’s about time, lagi na lang binabalewala kasi there are a lot of ordinances regarding the banning of smoking but never been implemented kasi balewala ‘yung penalty,” ani Sison.

Maski aniya ang mga empleyado ng city hall ay hindi na pinapansin ang smoking ban.

“When we reviewed it, naisip namin na kailangan na itaas. Kagaya na lang sa city hall, sa mga bintana d’un, lahat ng bintana puno ng upos ng sigarilyo,” pahayag ni Sison.

Mula nang maospital nitong Disyembre dahil sa asthma attacks, tinigil na ni Estrada, ang paninigarilyo.

Ayon sa 79-taong alkalde, hangarin niyang pangalagaan ang kalusugan ng bawat Manilenyo mula nang umupo siya noong 2013.

Matatandaang mahigpit na ipinatupad sa Maynila sa kautusan na rin ni Estrada ang smoking ban sa lungsod. JOCELYN TABANGCURA-DOMENDEN

DEAD-ON-THE-SPOT ang isang 55-anyos na family driver matapos barilin ng riding-in-tandem kahapon ng umaga (Miyerkules) sa Tondo, Maynila.

Kinilala ni SPO2 Jonathan Bautista, imbestigador ng Manila Police District-Homicide section, sa pamamagitan ng mga identification cards na nakuha sa biktima na si Jovito Ferido, driver-care taker ng ZELCOR Enterprises, stay-in sa 523 Remedios St., Malate, Maynila, at taga-161 Elison Ville Subd., Corregidor Sat., General Trias, Cavite.

Sa imbestigasyon, alas-8:27 ng umaga nang maganap ang insidente sa 711 Delpan St., Binondo habang nakahinto ang biktima lulan ng kanyang motoriklong Honda TMX red (DA 81879).

Nabatid na trapik sa lugar kaya nakahinto ang biktima nang sumulpot ang riding-in-tandem na kapwa naka-helmet habang ang isa’y armado ng kalibre .45 saka dinikitan ang biktima at walang sabi-sabing pinagbabaril.

Ilang mga tambay sa lugar naman ang nagsasabing hinoldap ang biktima at kinuha ang gold na kwintas nito.

Bagama’t holdap ang nakikitang dahilan ng pagbaril sa biktima, palaisipan pa rin pulisya kung bakit sa ulo ito binaril.

Dahil dito, nagsasagawa pa ng mas malalim na imbestigasyon ang pulisya sa tunay na motibo ng pagpatay sa biktima. JOCELYN TABANGCURA-DOMENDEN

PATAY ang isang barangay chairwoman nang pagbabarilin ng isang gunman habang naglalakad pabalik sa barangay hall, matapos magkabit ng tarpaulin sa Tondo, Maynila kagabi.

Hindi na naisalba pa ng mga doktor sa Chinese General Hospital ang buhay ng biktimang si Nenita Acuña, 43, dalaga, chairwoman ng Brgy. 200, Zone 18, District 2, at taga-1026-A Hermosa St., sa Tondo, bunsod ng dalawang tama ng bala sa ulo.

Tinutugis na ng mga awtoridad ang isang Adrian Tayag, alyas ‘Pitong’, na taga-Tayag St., Tondo matapos iturong responsable sa pagpatay.

Sa imbestigasyon ni SPO2 Richard Escarlan ng Manila Police District (MPD)-homicide section, dakong 6:59 ng gabi nang maganap ang krimen sa isang eskinita, sa Dela Cruz St. kanto ng Hermosa St. sa Tondo.

Nabatid na katatapos lamang umanong magkabit ng mga tarpaulin ng biktima kasama ang barangay treasurer na si Jesskenlee Torres, 29, at isang barangay tanod nang isagawa ng suspek ang pagpatay.

Nakuhanan pa sa CCTV camera ang paglalakad ng biktima at mga kasamahan nito, habang kasunod ang suspek, na umiinom pa ng softdrinks, at naka-ball cap, tribal gear jacket, maong short pants at armado ng kalibre .45 baril.

Maya-maya ay nagulat na lamang ang mga kasamahan ng biktima nang makarinig ng dalawang magkasunod na putok ng baril at nang tingnan ay papatakas na ang suspek, habang duguan nang nakahandusay ang kapitana.

Isinugod naman ni Torres at Kagawad Noemi Acuňa sa pagamutan ang biktima pero nasawi rin dakong 7:50 ng gabi.

Kaagad namang nagsagawa ng follow-up operation ang mga awtoridad sa tahanan ni Tayag dakong 7:30 ng gabi ngunit bigo silang maaresto ito.

Sa halip, nadakip ng mga pulis ang mga suspek na sina Allan Tayag, 19, at Florentino Cadano, 32, kapwa Hermosa St., Tondo, nang makumpiskahan ng dalawang sachet ng shabu at isang kalibre .38 na paltik na kargado ng limang bala.

Inaalam pa ng mga awtoridad ang posibleng motibo ng krimen at kung posibleng may kinalaman ba ito sa trabaho ni Acuña bilang kapitana ng barangay. JOCELYN TABANGCURA-DOMENDEN

SUGATAN ang dalawang helper nang pagbabarilin ng ‘di kilalang suspek habang sakay ng isang tricycle sa harapan ng isang health center sa Port Area, Maynila kagabi.

Ginagamot ngayon sa Gat Andres Bonifacio Memorial Medical Center ang mga biktimang sina Billy Boy Queremit, 23, at Andrew Curado, 19, kapwa helper sa Divisoria, at taga-Blk. 1, Baseco Cmpd., Port Area, Manila.

Sa report ni Police Supt. Emerey Abating, station commander ng Manila Police District (MPD)-Station 5, nabatid na dakong 10:00 ng gabi nang maganap ang insidente sa harapan ng Baseco Health Center, sa Baseco Compound.

Nauna rito, papasok na ng trabaho ang mga biktima ngunit pagsakay nila ng tricycle ay nakarinig na sila ng dalawang putok ng baril at nang tingnan ay may dugo nang umaagos sa kanilang mga braso.

Nakita rin naman umano ng tricycle driver na si Jesus Ortega, kaya’t sa halip na sa Divisoria ay sa Gat Andres Bonifacio Hospital na sila nito isinugod upang malapatan ng lunas.

Inaalam naman ng pulisya kung ang mga biktima ang talagang target ng pamamaril ng ‘di nakilalang suspek, o kung tinamaan lamang sila ng ligaw na bala.

Patuloy ang imbestigasyon sa kaso. JOCELYN TABANGCURA-DOMENDEN

TODAS ang isang 27-anyos na lalaking miyembro ng Fraternity matapos saksakin ng kanyang dating kaaway habang naglalakad sa Tondo, Maynila.

Kinilala ang biktimang si Jason Francisco , walang asawa, miyembro ng Tau Gama Phi at taga-Bldg. 28, Unit 515, Permanent Housing, Tondo, Maynila.

Nakatakas naman ang suspek na si Rodelio Mamucod alyas “Iyong”, ng Purok 6, Alley III, Permanent Housing, Tondo, Maynila.

Nabatid na may kausap ang biktima kasama ng kanyang mga kaibigan nang lapitan ng suspek at walang sabi-sabing sinaksak nang dalawang beses.

Agad isinugod sa Tondo Medical Center ang biktima pero ‘di na rin umabot nang buhay.

Ayon sa pulisya, sangkot ang biktima sa tatlong murder case sa kaibigan ng suspek nitong nakaraang Enero.

Patuloy ang imbestigasyon ng pulisya hinggil sa nasabing insidente. JOCELYN TABANGCURA-DOMENDEN

ARESTADO ang tatlong katao na itinuturong mga responsible sa pagtangay ng mga motorsiklo sa Maynila, kabilang ang pagma-may-ari ng isang lady cop sa isinagawang follow-up operation sa Tondo, Manila kaninang madaling-araw.

Kasong paglabag sa Republic Act 6539 (motornapping) ang isinampa laban sa mga suspek na sina Vejay Bautista, 23, ng Villaruel St., Jose Abad Santos, Tondo; Ferdinand Constantino, Jr., 27, tricycle driver, ng 1949 G. Perfecto St., Tondo; Anjun dela Cruz, 27, tricycle driver, ng 1915 Capulong Highway, Tondo.

Sa report ni Police Supt. Alex Daniel, station commander ng Manila Police District (MPD)-Station 7, nabatid na dakong 1:00 ng madaling-araw nang maaresto ang mga suspek sa G. Perfecto St. sa Tondo.

Nabatid na nagreklamo sa pulisya si PO1 Rizalyn Tamodra, 26, ng 447 Lacson St., Sampaloc, Manila, matapos tangayin ng mga suspek ang kanyang motorsiklo (NE-44303) na may sidecar, dakong 2:00 ng hapon kamakalawa, habang nakaparada sa Lacson St.

Bunsod nito, nagsagawa ng follow-up operation ang mga tauhan ng MPD-Station 7 at Station 4, na nagresulta sa pagkakaaresto sa mga suspek.

Nabawi mula sa mga ito ang motorsiklo ng lady cop at isa pang unit ng motorsiklo na may sidecar at walang plate number.

Sinasabing sangkot ang mga suspek sa serye ng motornapping incidents sa Maynila. JOCELYN TABANGCURA-DOMENDEN

DEDBOL ang isang lalaki matapos mang-agaw ng baril sa ikinasang operasyon sa Arellano Ave., Brgy. 732, Singalong, Maynila.

Kinilala ang suspek na si Christopher Velasco, 27, nagtatrabaho tagabantay ng dyip sa Brgy. 739.

Ayon kay Police C/Insp. Paulito Sabulao, commander ng Arellano Police Community Precinct, nagsagawa ng one-time big-time operation ang kanyang mga tauhan sa naturang barangay.

Nahulihan umano ng patalim ang suspek dahilan para damputin ito at posasan.

Matapos posasan, tumakbo ang suspek papunta sa kabilang barangay, tumalon sa bubong at pumasok sa bahay ng isang Fely delas Nieves.

Dito na siya hinabol ng mga pulis, hanggang sa makorner ito sa loob ng banyo.

Kwento ni Sabulao, nang bibitbitin na ang suspek, agad nitong inagaw ang baril ng pulis dahilan para paputukan ito at mapatay.

Ayon kay Sabulao, kalalaya lamang ng suspek mula sa kasong pagtutulak ng droga.

Nagpapatuloy naman ang imbestigasyon ng pulisya na pagkakapatay kay Velasco. -30-

TEPOK ang isang lalaking itinuturong kilabot na ‘hitman’ sa Laguna cor. Molave St., Tondo, Maynila.

Kinilala ang suspek na si Arvel Boy Aquino, alyas ‘Sundalo’ na aarestuhin na sana pero nanlaban pa sa mga pulis.

Poposasan na umano ang suspek na armado ng kalibre .45 pero pinaputukan pa rin nito ang mga pulis. Nakuhanan pa ang bangkay ng napatay ng tatlong sachet ng shabu.

Sugatan rin sa operasyon ang isang operatiba ng pulisya matapos tamaan ng bala sa kaliwang hita.

Ayon kay Supt. Alex Daniel, hepe ng Abad Santos Police Station, si Aquino ang suspek sa pagpatay sa dalawang babae sa Antipolo St. noong February 11.

Sinasabing si Aquino rin ang gun-for-hire ng mga drug pusher sa lugar na pumapatay sa mga impormante. JOHNNY ARASGA

DALAWANG suspek sa pagkamatay ng isang lady cop kamakailan ang rinatrat kung saan isa ang namatay at isa ang sugatan sa Sta. Cruz, Maynila.

Idineklarang patay sa Jose Reyes Memorial Medical Center si Jefferson Li, ng 1478 Estero de San Lazaro, Sta. Cruz, Manila sanhi ng tama ng bala habang ginagamot sa nasabi ring ospital ang kapatid nitong si Gerard Li, 24, may tama ng bala sa kanang paa.

Sugatan din matapos tamaan ng ligaw na bala si Madilino Futol, 40, vendor, ng 1478 Estero De San Lazaro, Sta. Cruz.

Sa imbestigasyon, dakong 8:30 ng gabi nang naganap ang pamamaril sa dalawa malapit sa Sta. Cruz Church.

Nabatid na boluntaryong nagtungo ang magkapatid sa MPD Headquarters para sa imbestigasyon matapos mapasama ang kanilang pangalan sa “person of interest” sa pagpaslang kay PO1 Jorsan Marie Alafriz, 25, nakatalaga sa Barbosa Police Community Precinct at taga-1425 Lope De Vega St., Sta. Cruz.

Nang matapos ang imbestigasyon at wala namang ebidensiya na nag-uugnay sa kanila sa pagkamatay ni Alafris ay itinurnover na sila sa kanilang ina na si Susana Li.

Pag-alis sa tanggapan ng MPD, sumakay sa motor ang magkapatid habang ang kanilang ina na si Susana at ka-live in ni Gerard ay sumakay naman sa Taxi.

Habang magkaangkas ang magkapatid sa isang motorsiklo ay sinundan sila ng mga suspek na naka-helmet at maskara saka pinagbabaril.

Dito na nalaglag sa motorsiklo si Jefferson gayunman nagawa pang tumakbo ngunit patuloy siyang pinagbabaril ng mga suspek habang ang kapatid na si Gerard ay nakahingi naman ng tulong sa kalapit na police outpost.

Patuloy ang imbestigasyon ng pulisya sa motibo ng pamamaril sa magkapatid. JOCELYN TABANGCURA-DOMENDEN

ISANG mister ang sugatan nang barilin ng isang barangay kagawad sa harapan mismo ng kanyang anak na lalaki sa Tondo, Maynila kagabi.

Ginagamot ngayon sa Tondo Medical Center ang biktimang si Antonio Langcay, 49, ng A-1 Maginoo St., Tondo matapos barilin sa tiyan ni Dan Aliman, kagawad ng Brgy. 105, Zone 8, at taga-Happy Land, Tondo, sa tulong ng dalawa pang ‘di kilalang lalaki.

Nabatid na dakong 8:50 ng gabi nang maganap ang pamamaril sa Lopez Jaena St. sa Tondo.

Sa imbestigasyon, naglalakad si Langcay sa naturang lugar pauwi nang bigla na lang siyang lapitan ni Aliman, na may kasamang dalawang ‘di kilalang lalaki, at kaagad na pinaputukan sa tiyan, sa harapan mismo ng kanyang anak na si Christopher, 31.

Nang maisakatuparan ang pakay sa biktima ay tumakbo patakas ang mga suspek habang isinugod naman sa naturang pagamutan ang biktima.

Sinasabing may dati nang alitan ang biktima at si Aliman na posibleng dahilan ng pamamaril. JOCELYN TABANGCURA-DOMENDEN

PATRAYDOR na binaril sa ulo ang isang binata ng hindi nakilalang suspek habang hinihintay ang kanyang kaibigan sa isang playground sa Port Area, Maynila kamakalawa.

Binawian ng buhay habang nilalapatan ng lunas sa Gat Andres Bonifacio Memorial Medical Center ang biktimang si Usman Unto, 30, ng 1418 Roxas Blvd., kanto ng Salud St., Pasay City ngunit nasawi rin habang mabilis namang tumakas ang ‘di kilalang suspek, bitbit ang armas na ginamit.

Sa imbestigasyon no SPO2 Richard Escarlan ng Manila Police District (MPD)-homicide section, alas-4:30 ng hapon habang hinihintay ng biktima ang kanyang kaibigan na kakatagpuin sa Baseco Playground sa Blk. 9 Habitat, Baseco Cmpd., sa Port Area, nang bigla na lang lapitan ng suspek mula sa likuran at patraydor na binaril sa ulo saka tumakas.

Ang pangyayari ay nasaksihan ng isang tricycle driver kaya agad na ipinagbigay-alam sa barangay at isinugod ang biktima sa pagamutan ngunit nasawi rin.

Inaalam pa ng pulisya ang motibo sa pamamaslang at pagkakilanlan ng salarin. JOCELYN TABANGCURA-DOMENDEN

NASUNOG ang isang residential area sa kahabaan ng Dimasalang at Algeciras St., Brgy 484, Sampaloc, Maynila.

Umabot sa ikalimang alarma ang nasabing sunog kaninang 5:45, pero idineklara naman ng Bureau of Fire Protection (BFP) na under control kaninang 6:20 rin ng umaga.

Iniimbestigahan pa kung ano ang pinagmulan ng sunog na nagsimula pasado alas-4:00 ng madaling-araw.

Bahagya namang nahirapan ang mga bumbero na apulahin ang sunog dahil magkakadikit ang mga bahay na pawang gawa sa mga light materials, at dahil na rin sa masisikip na eskinita.

Sa kabutihang dako, wala namang naitalang namatay, pero inaalam pa ng mga otoridad kung ilan ang nasugatan sa insidente, pati na ang kabuuang halaga ng mga ari-ariang natupok ng apoy. JOHNNY ARASGA

NAGBIGTI ang isang 33-anyos na construction foreman sa pamamagitan ng isang kumot sa loob ng kanyang inuupahang tahanan sa Malate, Manila kagabi.

Kinilala ang biktimang si Junie Tapinet, alyas ‘Jhong,’ 33, binata, construction foreman, ng 2381 Arellano Ave., Singalong, Malate.

Sa ulat ng Manila Police District (MPD)-homicide section, nabatid na dakong 8:10 ng gabi nang matagpuang nakabigti ang biktima sa loob ng kanyang bahay sa Arellano Ave.

Sa salaysay ng kanyang kapitbahay na si Simeon De Lima, nabatid na huli nilang nakitang buhay ang biktima dakong 11:00 ng umaga, nang makisuyo ito sa kanya na ibili siya ng isang tasa ng kape.

Kinagabihan ay pinuntahan naman umano ng isa pang kapitbahay na si Arsenio Jose, isang karpintero, ang biktima at tinangkang katukin ang pintuan nito ngunit walang sumasagot.

Sinubukan umano ni Jose na buksan ang pinto at natuklasang bukas ito.

Nagulat naman si Jose nang makitang patay na ang biktima at nakabigti gamit ang isang kumot.

Kaagad namang nagtungo si Jose sa barangay outpost upang i-report ang pangyayari.

Bukod sa dugong tumutulo sa hita ng biktima mula sa kanyang puwit, ay wala naman umanong nakita ang mga pulis na anomang sugat sa katawan ng biktima, na indikasyong posibleng sinadya ang pagkamatay nito.

Gayunman, aalamin pa rin ng pulisya kung posibleng may foul play sa insidente. JOCELYN TABANGCURA-DOMENDEN

UTAS ang isang 39-anyos na suspek sa iligal na droga nang manlaban sa mga umaarestong pulis sa Tondo, Maynila.

Kinilala ang suspek na si Santi Ramirez, ng Temporary Housing building sa Tondo.

Sa imbestigasyon, nagsagawa ng operasyon ang grupo ng Drug Enforcement Unit sa Aroma Cmpd. sa Balut, Tondo kagabi para arestuhin ang suspek.

Nang makita na ng suspek ang mga awtoridad ay nagsibunot na ang mga ito ng baril at nagpaputok dahilan para gumanti ang mga awtoridad na nagresulta sa pagkamatay ng suspek.

Ayon kay PO2 Benjamin Ferrer III, nakuha sa pinangyarihan ng insidente ang isang paltik na .38 na pag-aari ng suspek at mga bala. JOCELYN TABANGCURA-DOMENDEN

ISANG 44-anyos na babaeng hinihinalang drug pusher ang binaril ng isang notoryus na holdaper bilang pagganti sa kanyang ina na ipinahuli ng una sa Singalong, Maynila.

Hindi na umabot nang buhay sa Philippine General Hospital (PGH) dahil sa tama ng bala sa ulo ang biktimang si Elna Raga, ng 2377 Arellano Ave., Singalong, Maynila.

Tinutigis naman ng pulisya ang suspek na si Ronron Orbeta, 26, kilalang holdaper sa Singalong na tumakas matapos ang insidente.

Sa report ni PO3 Jorlan Taluban ng Manila Police District (MPD)-homicide section, pasado alas-11:00 ng umaga nang maganap ang insidente sa Dama De Noche at Cadena De Amor Sts., Singalong.

Ayon sa saksi, bago maganap ang pagpaslang ay ilang araw na umanong nakikitang paikot-ikot sa lugar ang suspek.

Pinaghihinalaan ng suspek ang biktima na siyang nagpahuli sa kanyang ina na drug pusher rin at nakakulong ngayon sa Manila City Jail.

Si Raga, umano’y asawa ng kapatid ng Barangay Chairman sa lugar, ay binaril ni Orbeta habang naglalakad sa nasabing lugar kung saan nakita pa sa CCTV camera na may dala itong shabu nang bumagsak sa kalsada.

Mabilis na tumakas si Orbeta kung saan iniwan nito ang suot na jacket, maskara at sumbrero sa likurang bahagi ng barangay hall.

Inamin naman ng asawa ng biktima na si Arman, 49, na sangkot ang kanyang asawa sa pagbebenta ng iligal na droga sa loob ng mahigit 10 taon. JOCELYN TABANGCURA-DOMENDEN

INIIMBESTIGAHAN ngayon ng Manila Police District (MPD) ang pagkamatay ng isang Guest Relation Officer (GRO) matapos matagpuang patay sa loob ng kanyang inuupahan unit sa Malate, Maynila.

Kinilala ang biktimang si Eunice Espinosa Nadale, 27, walang asawa, GRO ng Blue Angel KTV, at taga-1132 Unit 6, P. Arellano St., Malate.

Sa imbestigasyon ng MPD-Homicide Section, dakong 4:45 ng madaling-araw nang matagpuan ang bangkay ng biktima sa loob ng kanyang bahay.

Bago ang insidente, nakarinig umano ng sigaw ang kapitbahay ng biktima na tila nanghihingi ito ng tulong ngunit hindi nila ito pinansin.

Kasunod nito, pumanhik naman si Virgie Recalde, 50, cook, upang puntahan ang silid ng biktima kung saan dito na ito nadiskubreng duguan at wala nang buhay.

Agad naman nitong ipinagbigay-alam sa kanilang barangay sa Zone 84 ang insidente at itinawag sa pulisya.

Sa CCTV ng nasabing barangay, kitang-kita naman ang isang lalaki na nakaputing damit at short na tumatakbo palayo sa bahay ng biktima.

Posibleng pagnanakaw ang motibo sa pagpatay sa biktima at may indikasyon ding nanlaban ito sa suspek.

Dalawang lalaking hindi muna pinangalanan ng pulisya ang inimbitahan upang kuhanan ng finger print at ibase sa mga nadiskubreng bakas sa crime scene.

Gayunman, patuloy na nagsagawa ng imbestigasyon ang pulisya hinggil sa nasabing insidente. JOCELYN TABANGCURA-DOMENDEN

PINAGBABARIL ng ‘di nakilalang suspek ang isang AWOL (absent without leave) na pulis habang may kausap sa cellphone sa harapan mismo ng kanilang tahanan sa Port Area, Maynila.

Namatay noon din ang biktimang si PO1 Jay Paguinto, 37, dating nakatalaga sa Quezon City Police District (QCPD), at taga-007 Blk. 9, Old Site, Baseco Cmpd., Port Area, bunsod ng mga tama ng bala sa iba’t ibang bahagi ng kanyang katawan.

Sa ulat ni SPO1 Joseph Kabigting ng Manila Police District (MPD)-homicide section, may kausap ang biktima sa cellphone pasado alas-5:00 kahapon sa harapan ng kanilang bahay na tila nakikipag-away.

Nagulat na lamang ang ilang tao sa lugar nang may marinig na mga putok ng baril at makitang duguang bumulagta ang biktima.

Agad namang ipinagbigay-alam ng mga nakakita ang pangyayari sa kanilang barangay na siya namang nag-report sa pulisya.

Wala namang makuhang iba pang impormasyon ang pulisya sa pagkamatay ng biktima dahil natatakot ang mga residente na baka sila naman ang balikan ng suspek.

Sa ngayon ay blangko pa ang pulisya sa motibo ng pamamaslang kay Paguinto gayundin ang pagkakilanlan ng suspek. JOCELYN TABANGCURA-DOMENDEN